Take a fresh look at your lifestyle.

蚊怕水

0 1,421

我係超嘢蚊的體質…有人話可能體溫偏高 (但我又唔覺喎)….亦有人話因為我嗜甜 (這點我認)….亦有因為係O型血(我都係)…..但無論如何, 我在蚊界, 非常受歡迎….最誇可以一次中幾廿嘢 (死都記得係飛鵝山….太恐怖了)….結果回家要食抗敏藥才可以收到科. 其實我怕蚊咬, 係有啲蚊會令我引發皮膚敏感…

 

所以我隨身的包包, 未必像其他女仔有補妝用品, 但一定有止蚊叮後的止痕藥 (遲啲介紹). 而蚊怕水…亦係我去造戶外運動前的必需品….所以對蚊怕水…我都略有心得.

 

我都知DEET 對身體唔多好…但佢偏偏可以驅蚊. 而度數越高, 驅蚊力越強

IMG_3065

  1. 3M Ultrathon 12hr Insect Repellent DEET 34.34%

冇得傾, 佢係我用過最強的產品. 話說有次去菲律賓潛水, 住的地方超簡陋….啲蚊多到拍得住飛鵝山….我哋成團潛有各有不同的蚊怕水 (基本上都係藥房上架牌子)….結果係…都有被咬到飛起 (有啲多啲, 有啲少啲而已)…唯獨我一個冇乜事……結果, 大家都問我借嚟搽, 唔係冇啖好食, 亦瞓唔到.

 

這隻膏冇味, 但有個好大的缺點….就係笠到飛天, 局身到無輪…..覺得佢簡直可以將我兩條肥髀痴埋….

 

佢嘅耐力好夠…基本上行山成幾個小時都ok架. 人地話3M 綠色裝抗蠓一流…但對我嚟講就唔多得…反而佢好啲. 不過蚊佢基本上100%頂得住…蠓就70% la….綠裝就20%都冇.

 

  1. 3M Ultrathon 8hr Insect Repellent DEET 25%

話晒DEET少啲…功效34.34%嗰枝咁強架LA…不過, 佢就冇咁笠….如果34.4%笠度係10, 佢只得4. 當然都冇咁局身.

 

佢係我跑街或球場的必需品; 但行山同去落後地方潛水, 佢唔夠照 ~  只可以說球場啲蚊冇咁兇悍.

 

如你去街唔多出汗…佢都OK 架. 但一出咗汗…你噴咗的地方, 真係滑過一條鱔, 又帶啲笠….如跑完要造拉筋和體能, 有抱腿的動時, 掂到自己就如捉住一條鱔咁….唔多”舒暢”.

 

 

  1. MooGoo Tail Swat Body Spray DEET free

其實跑班啲同學仔好好…都會帶上各式各樣的蚊怕水share 的….冇DEET, 天然的…我都有借用….因出咗汗都唔滑又唔笠.

 

佢哋有啲用有香茅成份的 (我個人不喜歡這個味道); 反而有位用花露水的, 就OK. 抗蚊力都OK 架….跑一晚, 可能叮一兩粒而已 (3M 基本上係0)….但唔笠又的確係賣點.

 

之前試咗MOOGOO的MSM 舒緩霜都幾好, 就用埋佢哋嘅天然牛尾驅蚊液. 佢同香茅一樣, 都係用植物的香味驅蚊….但論味道牛尾的淡好多…只係似普通帶微香的body lotion 嗰種feel; 只會在初噴時, 聞到小小香味, 但不久就消失. 論質感, 佢未至於花露水咁薄身…有啲似有潤膚成份的toner 咁上下感覺.

 

去球場係造到0蚊叮. 我試過去郊外用: 那天我著了一條薄長褲 + t-shirt; 所以我只噴了手, 冇噴腳. 郊區蚊真係兇猛好多, 隔住褲都中了3-4粒, 襪同褲中間嗰dd 小腿位, 中曬….最慘係衰蚊連面都咬….額, 下巴, 頸都有! 相對, 噴了moogoo 的雙手, 只在手臂中了1粒而已.

 

Leave A Reply

Your email address will not be published.